Mosfellsdalur

Fréttir úr Dalnum og hvað er framundan:

Kynningarfundur um áherslur í skipulagi Mosfellsdals og Þingvallavegar fyrir íbúa Mosfellsdals

Mættir voru u.þ.b. 50 Dalbúar auk annarra gesta frá hlutaðeigandi.
Fundarstjóri var Valdimar Birgisson, formaður skipulagsnefndar.

Boðað var til fundarins að frumkvæði Víghóls, samtaka íbúa í Mosfellsdal.

Á fundinum komu fram:
Kristinn Pálsson skipulagsfulltrúi í Mosfellsbæ - Áherslur í skipulagi. Vinnslutillagu að aðalskipulagi fyrir Mosfellsdal. Markmið með aðalskipulagi er að skapa betri forsendur fyrir öruggari og heildstæðari skipulagningu svæðis í þéttbýli en Mosfellsdalur er lykilsvæði fyrir sjálfbæra þróun með áherslu á náttúruvernd, dreifða byggð og vistvænan landbúnað í samræmi við sérstöðu landslags og menningar.
Guðmundur Kristjánsson fyrir hönd Eflu og Vegagerðarinnar - Hönnun Þingvallavegar. Fyrirhugaðar framkvæmdir á Þingvallavegi sem einkennast helst af breikkun vegarins sem og öruggum þverunum í hverfi Mosfellsdals.
Lárus Elíasson leiðtogi Mosveitna – fyrirhugaðar breytingar á fráveitulögnum samhliða framkvæmdum á Þingvallavegi.
Kynningar þessara aðila má finna fyrir neðan samantekt af fundinum.

Að loknum kynningum var fyrirspurnum svarað.

Samantekt:
Núverandi aðalskipulag er í endurskoðun og kemur til með að gilda til 2040. Innan skamms verður það kynnt fyrir íbúum og leitað eftir frekara samtali.
Íbúar komu með marga góða punkta meðal annars um almenningssamgöngur og ýmsa þjónustu. Var vel tekið í þær ábendingar sem fram komu. Yfirvöldum virðist vera mikið í mun að fá sjónarmið íbúa fram.
Dalurinn er mjög fjölbreytt byggð, bæði skipulagt landbúnaðarsvæði og þéttbýli. Því þarf að vanda til verka þegar verið er að samþætta ólíkar þarfir og sjónarmið.
Forhönnun vegna nýs Þingvallavegar er lokið og er vinna við verkhönnun að fara af stað. Gert er ráð fyrir fjármagni til framkvæmda í samgönguáætlun 2028. Notað verður malbik í yfirborð vegarins og göngustígs. Götulýsing færist yfir veginn og verður á milli göngustígs og akvegar.
Ábending kom um hugsanlega hljóðmengun frá veginum. Hvorki er gert ráð fyrir hljóðvörnum né vegriði á milli akvegar og göngustígs. Göngu- og hjólastígur verður u.þ.b. 3ja m breiður með 25 cm öxlum hvoru megin. Veghelgunarsvæði vegarins er 30-50 m í hvora átt frá miðlínu akvegar sem með vegöxlum verður 9 m breiður.
Komið var á framfæri áhyggjum íbúa af umferðarhraða á Þingvallavegi. Vegurinn verður áfram ein akrein í hvora átt og gert ráð fyrir að hægt verði að endurskoða hámarkshraða til lækkunar, hann er nú 70 km/klst.
Athugasemdir komu um áætlaða drenlögn sem verður undir göngustígnum (u.þ.b. þar sem skurðurinn er núna). Miklar efasemdir eru um að hún muni geta tekið við því mikla vatnsmagni sem um er að ræða.
Íbúi minntist á stöðugan straum ferðamanna með tilheyrandi umferð og hávaða og vakti athygli á að stjórnsýslan þyrfti að huga að því hvort aðalleiðin til Þingvalla þurfi/ætti að liggja um Mosfellsdal og hlaut lófatak fyrir.
Ekki verður farið í umfangsmiklar umbætur á lagnakerfi Dalsins, sem komið er til ára sinna, fyrr en stofnlögnin hefur verið endurnýjuð. Mikið hefur verið um bilanir síðustu ár amk. 5-7 á ári skv. Lárusi.
Forhönnun á stofnlögnum er í bígerð og verkhönnun áætluð síðar á þessu ári.
Neysluvatnslögn verður undir stígnum og háspennustrengur aðeins til hliðar. Þetta kemur til með að auðvelda viðhald og viðgerðir til muna.
Varðandi rotþrær þá eru þær á ábyrgð húseiganda og eftirlit í höndum heilbrigðiseftirlits. Tíðni tæminga var um áramót breytt úr 2ja ára fresti í 3ja ára fresti. Lækkar gjaldið í 35 þúsund á ári.
Glærur frá kynningunum eru í viðhengjum og bendum við íbúum á að kynna sér þær vel og skoða myndir og teikningar.
Ljóst er að mikið er framundan á næstu árum og margt sem verður gert. Mikilvægt er að við sem einstaklingar leitumst við að fylgjast vel með í þessum málum og gera athugasemdir á réttum vettvangi þegar við á.

Stjórn Víghóls þakkar góða og málefnalega þátttöku.